पेपर फुटीमुळे NEET २०२६ परिक्षा रद्द ; केंद्र शासनाच्या मंजूरीनंतर एनटीएचा निर्णय, आता पुन्हा द्यावी लागणार परिक्षा
देशभरातील लाखो वैद्यकीय प्रवेश इच्छुक विद्यार्थ्यांसाठी मोठी आणि धक्कादायक बातमी समोर आली आहे. ३ मे २०२६ रोजी घेण्यात आलेली NEET UG 2026 परीक्षा अखेर रद्द करण्यात आली आहे. पेपरफुटी आणि परीक्षा प्रक्रियेमधील गंभीर अनियमिततेच्या आरोपांनंतर नॅशनल टेस्टिंग एजन्सी (NTA) ने केंद्र सरकारच्या मंजुरीनंतर हा महत्त्वपूर्ण निर्णय घेतला आहे. या संपूर्ण प्रकरणाची सखोल चौकशी आता केंद्रीय अन्वेषण विभागाकडे म्हणजेच CBI कडे सोपवण्यात आली आहे.
मिळालेल्या माहितीनुसार, NEET परीक्षेपूर्वी काही राज्यांमध्ये “गेस पेपर” आणि प्रश्नपत्रिका सोशल मीडियावर व्हायरल झाल्याच्या तक्रारी समोर आल्या होत्या. विशेषतः राजस्थानसह काही भागांमध्ये प्रश्नपत्रिकेतील अनेक प्रश्न आधीच बाहेर आल्याचा संशय व्यक्त करण्यात आला. तपास यंत्रणांनी दिलेल्या प्राथमिक अहवालात परीक्षा प्रक्रियेची गोपनीयता भंग झाल्याचे संकेत मिळाल्यानंतर NTA वर मोठा दबाव निर्माण झाला होता.
या पार्श्वभूमीवर NTA ने अधिकृत निवेदन जारी करत ३ मे रोजी झालेली संपूर्ण NEET UG 2026 परीक्षा रद्द करण्याचा निर्णय जाहीर केला. त्यामुळे देशभरातील २४ लाखांहून अधिक विद्यार्थ्यांना आता पुन्हा परीक्षा द्यावी लागणार आहे. नव्याने परीक्षा घेण्याची तारीख लवकरच जाहीर केली जाईल, असे NTA कडून सांगण्यात आले आहे.
विद्यार्थ्यांसाठी दिलासादायक बाब म्हणजे पुन्हा परीक्षेसाठी नवीन अर्ज किंवा नोंदणी करण्याची आवश्यकता नसणार आहे. आधीची नोंदणी आणि माहितीच ग्राह्य धरली जाणार असल्याची माहिती समोर आली आहे. तसेच अतिरिक्त परीक्षा शुल्क आकारले जाणार नसल्याचेही संकेत मिळत आहेत.
या निर्णयामुळे विद्यार्थ्यांमध्ये संताप, नाराजी आणि मानसिक तणावाचे वातावरण निर्माण झाले आहे. अनेक विद्यार्थ्यांनी अनेक महिने कठोर परिश्रम घेत परीक्षा दिली होती. मात्र आता पुन्हा तयारी करण्याचे मोठे आव्हान त्यांच्यासमोर उभे राहिले आहे. सोशल मीडियावरही विद्यार्थ्यांनी आणि पालकांनी NTA च्या परीक्षा व्यवस्थापनावर प्रश्न उपस्थित केले आहेत.
दरम्यान, केंद्र सरकारने या प्रकरणाची गंभीर दखल घेत CBI चौकशीचे आदेश दिले आहेत. पेपरफुटीमागे कोणते रॅकेट किंवा संघटित गैरप्रकार होते का, याचा तपास केला जाणार आहे. NTA ने देखील चौकशीसाठी सर्व कागदपत्रे आणि माहिती उपलब्ध करून देण्याचे आश्वासन दिले आहे.
#NEET2026 #NEETExam #NEETPaperLeak #NEETUG2026 #NTA #CBIInquiry #EducationNews #BreakingNews #NEETUpdate #ExamCancelled #Students #MedicalEntrance #IndiaNews #TrendingNews #LatestNews #ViralNews #MarathiNews #StudentNews #NEETReExam #ExamNews